s
s
s
s
s
s

El contenido de esta página requiere una versión más reciente de Adobe Flash Player.

Obtener Adobe Flash Player

Nouhad Benaguida
Nacionalidad:
Marruecos
E-mail:
Biografia

Nouhad Benaguida / Marruecos
نهاد بنعكيدا/ المغرب

إخس غامة .....أمدغيس


وقفت لمناول بين اكتافي
وطليت من شرجم ليلي
نسرق الشوفة
فـ خيالك وهو دايز
شهوتي نشوفك
ونرمي الركمة بلون حروفك

حمراني هاذ الليل
والشوفة فيه مقطعة
طراف طراف

ماعندي عليك هروب
غير نطيح عيني فـ لبياض
نتوسد ركبة الورقة
يتيمة أنا فأرض حروفك
مقطوعة من بياضك
وجدري لمجدر
مسقي بلحرقة

فكريني يا ورقتي
علاش انا فيك ؟؟؟؟
انتي دماغي
رديني لمجاجي
نتمرغ ف رملي الحامي
نتعلق بحدور نخلتي لمجردة
نتلثم بزروقية السما
نركب فوق حلمي العالي
نشد الطريق
لقبيلة أمدغيس

قالت مولات الفال :

إخس غامة
من ألف عام

وها انت ساكن فمنامتي
قاطع الطريق على ليلاتي
مكمش فـ يديك نهاراتي
وخا حامية شمسي
وخا قهرت فلفليافي
شحال من قيسي
ها أنت مسلطن
سلطان ايامي
تاج مجاجي
هازم بجيوش غرامك
ريح يأسي
وتراب اعجاجي

إخس غامة
و كيف الوصول ليك ؟؟؟؟
وانا ريحي مكسور لجناح
وسوالفي مجدافها قصيرة
وطريق القلب طويلــــــــــــــــة
طـــــــــــــــــــــــــــــــــــــــــــــــــــــــويلة

أنت الطريق
وشحال كليت فيك من خطوة
ولا وصلت ليك

أنت التيه
وشحال من نجمة
طمعتني بخيط شعاها
ولا لاحتني فيك

أمدغيس
اتقطع بيا لحبل فـ فيافيك
وزطاط قلبي
يسال ويسول
قوافل شادة الرحال
ولا عطاتني الطوع
ولا النعت عليك

أمدغيس
لا تغودا محال توصل ليـــــــــــــــــــــك

أمدغيس
حورية .............نتكب فـ وادك
جنية...................نتسيف ف نارك
ف دارك
ف خيمتك
وتادك
جوادك
نحرق قلبك
وكل ليلى قطرتها شموعك
على ورق اشعارك

أمدغيس
اسمعني بجوارحك
اقراني تيفيناغ فحيط جراحك
شمني وردة سمرة
لون بيها افراحك
وإيلا مشى ريحي وع رياحك الربعة
حكيني حكاية
للقمرة والشمعة
أمدغيس :

انت شبيهي .....ف فرحي
شبيهي .......ف جرحي
شبيهي........... ف قرحي
انا شبيهي .....فـ مكتوبي المطروز على لوحي

انت ................... انا
انا ..........انت
امدغيس
أنت الطير الحر
وأنا سماك
طير فيا
اطلع لبرج العشاق
وعطيها للتبراح
صلاتك ف مقامي واجبة
ادخل ديريو ديني
أنا فـ محراب هواك راهبة
اطلق بخور محاينك
وتجلى.... شيخ .....فـ بهاك

وفوق جلدي سيح
شتت أجر هواك
على بساطي
وحبات التسبيح

أمدغيس طابت لجراح
وغدا ملقانا
والوحدانية عطاتنا بالظهر
قول : يمكن اطلع الزهر
ما بين كثبان الرمل
ثمرات نسفوها على الريق

أمدغيس
العطش
وأنت الما
حلو لعطش والما فيك
أمدغيس
الطريق
وأنت الخطوة
طريقي صاوبتها بلممشى
ليك
بين مروج الزعتر

أمدغيس : يمكن شربتنا الطريق
وصلنا لغدا
وبعد غدا
يمكن الحلم الراقد فينا بدا يفيق

أمدغيس

لعطش
لفيافي
وقلة الزاد
جغمة من بيرك الغارق
تغرقني وتهيجني بحر
حجرة سمرة منك
نفرق الصوم
نتوسدها نرتاح
من ظلم الطريق
وحمورية لقهر
شوم حنين
يسوط على جوارحي
برد وسلام م الحر

أمدغيس

وخا صحاريك
خلا وقفار
وخا حلمك سراب
شهوتي ....
نقطة ما ...سمرة
من واحة عينيك
نشربها ف كفوفك
ونزيد

أمدغيس
ملقانا غدا
فـ لخلوة نشوفك
غدا عيد

نهز كفوف شوقي
ودعايا لسماك العالية
شوقي بلا جناح
يطير ويطيح
تتحتحت منو حنتو وحروفو
إخس غامة
رمان ودالية
محنية يديا ليك
حبق
سوسان
نعناع
مشموع بلعمان
ريش النعام

هدي مرفودتي ليك

أخس غامة
علاش أنا فيك ؟؟؟؟

هوامش
إخس غامة : أحبك.... باللغة الأمازيغية الطوارقية
أمادغيس : لقب أمازيغي

ياحرفي

ياحرفي
لاتعطيني بلقفا
لا تخليني
بين سماك
وأرضك تالفة
لا تقطع العادة
عليها نتعادا
راني فيك مربوطة
راني ليك عاطية العهد
ومسنية لوفا

ياحرفي
كن ليف أوكولني
كن وليفي لا تخوني
اعطيني راسك
نعطيك راسي
ندوزو فريضة لكتبة
نكون لباسك
تكون لباسي
من بعد لجفا
ينزل ملاك لمحبة
تكب فيا ماك
تكب فيا هواك
تنفخ فيا روح
من ارواحك
تشربني فرحك
واجراحك
تعلمني التهجية
والحبية فـ مراحك

ياحرفي
لكتابة ماشي بالجميل
لكتابة كيفها كيف الخاوا
خوك ............خوك
حرفك.......... حرفك
كيف تتبرى من خوك ؟؟؟؟
كيف تتبرى من حرفك؟؟؟
تتبرى من همك
تتبرى من سمك

حرفي ياحرفي
حرفي بيت الطاعة
شراجمو مترعة
وانا طلبتك فيه
عفاك طوعني
حرفي ياحرفي
حرفي قلبي دفوفو مشرعة
ونا تمنيتك تتربع عليه
تتمولك فيه
وانت طاج مني
ها شرع الحرف معاك
طوعني ولا قيلني

يكفيني نسرق الشوفة فيك
يكفيني نرمي خيوط راسي
تتحير بين ايديك
يكفيني نتمرغ فمداد عنيك

يكفيني تكون ليا
مرة فـ العام
ونكون ديما ليك

توحشت
توحشت نكون معاك اهبيل
تراري بيا
ونراري بيك
نحوزك ليا
وتحوزني ليك
تفيق معايا
على صوت الورقة
وهيا تتكسل فبياضها
نفيق معاك
على صوت لمداد
وهو يتركل فنصاص الليل
تحاجي ليا
ونحاجي ليك
نحيد شهوتي منك
نتعلم الخط فيك
واعليك

ياحرفي
افهمني ولا تعطيني
حط راسك
على ذاتي
تسنط لعظامي
استلغى لكلامي الدخلاني
تلقاني كلي تنهتهت بيك
ما سحى عرقي
من يوم دخلتيه
ما نشف عرقي
من يوم مجاجي سكنتيه
بيني وبينك شعرة
كيف النهار مع الليل
كيف العاقل مع لهبيل
بيني وبينك
غمزة
مقمطة فسبيبة
تجرك ليا
وتكون ديما خليل

ياحرفي
ازعم
ياحرفي
ازحم
السقية مطرطقة
ازحم
لقصيدة تتركل فماك
ازحم
الورقة شادة لحبل معاك
ازحم
سلسول تيلادك عاطي براسو
ازحم
يقلب فلقياسات على قياسو
ازحم
اعطيني من صلبك حفنة
ندردرها عل الوراق
نغرس احريفاتك فكل ركنة
نعتق بيها بوحبل
ايلا تقطع لحبل العتاق

نتخلوى فيها
إيلا لعقر قاس الراس
إيلا الورقة شابو نواظرها
والجهد تساس
ياحرفي اعطيني ولهتك
اعطيني نيتك
كن معايا صافي
شلى من قوالب
تعلمنا فالقوافي
الحرف د بصح ياحرفي
عمر ماكان نجمو
لا طايح ولا طافي

لهيـــه

لهيـــــــــــه
فذيك النقطة
لبعيدة
المرمية
المجلية
لهيـــــــــــه
فذيك الخالة
النابتة فوجه الكون
فـ الثلث الخالي
بين كراكر لحجر
بين مشامم الخزامى
وعواد الزهر
فـ بلاد الشيح والريح
فين عاطيه ريح الكون
وريحة الولادة
المعشبه بعشوب الموت
كافور
كتاب
وكتان فلون الثلج
لهيـــــــــــه
أبعد منك ....ومني
لهيه فذيك السما
المتاومة بشمس وقمرة
تمة كان الخلق
وكنت انا وياك
عجينة
نايضة م لأرض
تراب أحمر
عجاج الكون
ومـــا الحياة

دوى فينا صوت
داخل فالدواخل
صوت ينين
يمكن صوتك
يمكن صوتي
حنيـــــــــن
سمعتك ....سمعتيني
شفتك ......شفتيني
تطلينا بالحمري
طاحت الشتا
جا الربيع
فيه احنا
عشبة...... انا
وعشبة...... انت
شحال خصنا من عام
لولادة وحدة؟
آجي ناكلو فاكية الوقت
ونسرطو لسون الطريق
ولدني ولا نولدك ؟
تكون ولادة وحدة
وجعة مشروكة
على سرير الروح
يطيح تيلادنا
يبدا ميلادنا
كون أنت الروح
ونكون أنا
الكسدة
وكون أنت الكسدة
ونكون أنا الروح
مايهمش
ما نكونوش بحال الكاينين
ما نمشيوش مع الغاديين
ماترجعناش طريق الجايين

خلي الولادة تكون
وف حجرك يتولد الكون
خلي كونهم ليهم
خلي ريحه

 

Desarrollado por: Asesorias Web
s
s
s
s
s
s